രാജ്യത്തെ അമ്പത്തൊന്നാമത് ദേശീയദിനാഘോഷങ്ങളുടെ വേളയിൽ പാലിക്കേണ്ട നിയമങ്ങൾ സംബന്ധിച്ച് യു എ ഇ ആഭ്യന്തര മന്ത്രാലയം അറിയിപ്പ് നൽകി. 2022 നവംബർ 25-നാണ് മന്ത്രാലയം ഈ അറിയിപ്പ് നൽകിയത്.
പൊതുജനങ്ങളുടെ സുരക്ഷ മുൻനിർത്തിയാണ് ഇത്തരം ഒരു അറിയിപ്പ്. ഈ അറിയിപ്പ് പ്രകാരം, യു എ ഇ നാഷണൽ ഡേ ആഘോഷങ്ങളുമായി ബന്ധപ്പെട്ട് താഴെ പറയുന്ന നിയമങ്ങൾ പാലിക്കേണ്ടതാണ്:
- ദേശീയദിനാഘോഷങ്ങളിൽ പങ്കെടുക്കുന്നവർ ട്രാഫിക് നിയമങ്ങൾ, പോലീസ് അധികൃതർ നൽകുന്ന നിർദ്ദേശങ്ങൾ എന്നിവ കൃത്യമായി പാലിക്കേണ്ടതാണ്.
- മാർച്ചുകൾ, പൊതുഇടങ്ങളിൽ നടത്തുന്ന കൂടിച്ചേരലുകൾ എന്നിവയ്ക്ക് അനുമതിയില്ല.
- സ്പ്രേ ചെയ്യുന്ന തരത്തിലുള്ള എല്ലാ ഉപകരണങ്ങളും കർശനമായി വിലക്കിയിട്ടുണ്ട്. വാഹനങ്ങൾ ഓടിക്കുന്നവർ, വാഹനങ്ങളിലെ യാത്രികർ, കാൽനടക്കാർ എന്നിവർക്കെല്ലാം ഈ വിലക്ക് ബാധകമാണ്.
- കാറുകളുടെ ഇരുവശത്തേയും നമ്പർ പ്ലേറ്റുകൾ മറയ്ക്കുന്ന രീതിയിലുള്ള അലങ്കാരങ്ങൾക്ക് അനുമതിയില്ല.
- വാഹനങ്ങളുടെ നിറം മാറ്റരുത്.
- വാഹനങ്ങളുടെ ചില്ലുകളിൽ നിറങ്ങൾ, മറയ്ക്കുന്ന രീതിയിലുള്ള സ്റ്റിക്കറുകൾ എന്നിവ പതിക്കരുത്.
- വാഹനങ്ങളിൽ ഉചിതമല്ലാത്ത വാചകങ്ങൾ, അത്തരം സ്റ്റിക്കറുകൾ എന്നിവ പതിക്കരുത്.
- വാഹനങ്ങളിൽ പരമാവധി അനുവദനീയമായതിൽ കൂടുതൽ യാത്രികരുമായി സഞ്ചരിക്കരുത്. വാഹനങ്ങളിലെ യാത്രികർ സൺറൂഫ്, ജനലുകൾ എന്നിവയിലൂടെ തല, ദേഹം എന്നിവ പുറത്തേക്ക് നീട്ടി സഞ്ചരിക്കരുത്.
- വാഹനത്തിലെ എഞ്ചിന്റെ ശബ്ദം കൂട്ടുന്ന രീതിയിലുള്ള മാറ്റങ്ങൾ അനുവദനീയമല്ല. എഞ്ചിന്റെ ഘടനയിൽ മാറ്റം വരുത്തരുത്.
- വാഹനത്തിൽ നിന്നുള്ള കാഴ്ച മറയുന്ന രീതിയിലുള്ള മാറ്റങ്ങൾ അനുവദിക്കില്ല.
- റോഡിലെ ട്രാഫിക്കിന് തടസം വരുത്തുന്ന രീതിയിൽ വാഹനങ്ങൾ ഡ്രൈവ് ചെയ്യരുത്.
- പ്രധാന റോഡുകളിലും, ഉൾറോഡുകളിലും വാഹനങ്ങൾ ഉപയോഗിച്ചുള്ള സാഹസിക പ്രകടനങ്ങൾ കർശനമായി വിലക്കിയിട്ടുണ്ട്.
Cover Image: File Photo from WAM.
