ഈ വർഷത്തെ ഷെയ്ഖ് സായിദ് ഫെസ്റ്റിവൽ 2024 നവംബർ 1-ന് ആരംഭിക്കുമെന്ന് മേളയുടെ സംഘാടക കമ്മിറ്റി അറിയിച്ചു. എമിറേറ്റ്സ് ന്യൂസ് ഏജൻസിയാണ് ഇക്കാര്യം റിപ്പോർട്ട് ചെയ്തത്.
അബുദാബിയിലെ അൽ വത്ബയിൽ വെച്ചാണ് ഷെയ്ഖ് സായിദ് പൈതൃകോത്സവം 2024-2025 നടത്തുന്നത്. 2024 നവംബർ 1 മുതൽ 2025 ഫെബ്രുവരി 28 വരെയാണ് ഇത്തവണത്തെ ഷെയ്ഖ് സായിദ് ഫെസ്റ്റിവൽ സംഘടിപ്പിക്കുന്നത്.
നിരവധി വിനോദ-സാംസ്കാരിക പരിപാടികളിലൂടെ യു എ ഇയുടെ പൈതൃകം ആഘോഷിക്കുന്ന ഈ മേള “ഹയാകും” (അറബിക് സ്വാഗതം) എന്ന പ്രമേയത്തിൽ ഊന്നിയാണ് ഒരുക്കുന്നത്. യു എ ഇയുടെ സമ്പന്നമായ പൈതൃകവും മൂല്യങ്ങളും ആഗോള മാനുഷിക പ്രവർത്തനങ്ങളും പ്രദർശിപ്പിക്കുന്ന ഈ വർഷത്തെ പതിപ്പിലെ പരിപാടികൾ സംബന്ധിച്ച് ഫെസ്റ്റിവലിൻ്റെ ഉന്നത സംഘാടക സമിതി പ്രഖ്യാപനം നടത്തിയിരുന്നു.
ഇത്തവണത്തെ ഫെസ്റ്റിവലിൽ പ്രതിവാര ഉത്സവങ്ങൾ, 6,000-ലധികം അന്താരാഷ്ട്ര സാംസ്കാരിക പരിപാടികൾ, ആയിരത്തിലധികം ഷോകൾ, പ്രധാന പൊതു പരിപാടികൾ എന്നിവ അരങ്ങേറുന്നതാണ്. 30,000-ലധികം പ്രദർശകരും പങ്കാളികളും ഇത്തവണത്തെ ഷെയ്ഖ് സായിദ് പൈതൃകോത്സവത്തിൽ പങ്കെടുക്കുന്നുണ്ട്.
പ്രത്യേക പവലിയനുകളിലും വിഭാഗങ്ങളിലും ആദ്യമായി പങ്കെടുക്കുന്ന രാജ്യങ്ങൾ ഉൾപ്പെടെ 27-ലധികം രാജ്യങ്ങൾ ഈ മേളയിൽ പങ്കെടുക്കും. അന്തരിച്ച ശൈഖ് സായിദ് ബിൻ സുൽത്താൻ അൽ നഹ്യാൻ സ്ഥാപിച്ച പൈതൃകവും കാതലായ ദേശീയ മൂല്യങ്ങളും കാത്തുസൂക്ഷിക്കുന്നതിൽ യു എ ഇയിലെ ജനങ്ങളുടെ ശക്തിയുടെയും ഐക്യത്തിൻ്റെയും ആവർത്തന ദൃഢീകരണമായി ‘യൂണിയൻ പരേഡ്’ നടത്തുന്നതാണ്.
സർക്കാർ സ്ഥാപനങ്ങളിൽ നിന്നുള്ള ജനപ്രിയവും ഔദ്യോഗികവുമായ പങ്കാളിത്തത്തോടെ ആവേശകരമായ പരിപാടികൾ, പ്രവർത്തനങ്ങൾ, ഇവൻ്റുകൾ എന്നിവ ഉൾക്കൊള്ളുന്ന ഈ ഉത്സവം യു എ ഇയുടെ ദേശീയ ദിനം ആഘോഷിക്കുന്നതാണ്. നാടൻ കലാപരിപാടികൾ, പരേഡുകൾ, നറുക്കെടുപ്പുകൾ, സമ്മാനങ്ങൾ, സ്റ്റേജ് പ്രകടനങ്ങൾ, കരിമരുന്ന് പ്രയോഗങ്ങൾ, ഡ്രോൺ ഷോകൾ, ലേസർ ഡിസ്പ്ലേകൾ, സംഗീത കച്ചേരികൾ എന്നിവ ഉൾക്കൊള്ളുന്ന ഉത്സവം 14 ദിവസത്തേക്ക് യു എ ഇ ദേശീയ ദിനത്തെ അനുസ്മരിക്കുന്നതാണ്.
ഇത്തവണത്തെ ഫെസ്റ്റിവലിൽ ഏഴ് പ്രതിവാര ഉത്സവങ്ങൾ അവതരിപ്പിക്കുന്നതാണ്. ഇതിൽ ദേശീയ ദിനാഘോഷ ഉത്സവം, കുട്ടികളുടെയും കാർട്ടൂൺ കഥാപാത്രങ്ങളുടെയും ഉത്സവം, പുതുവത്സര ആഘോഷങ്ങളുടെ ഉത്സവം, കലകൾ, പൂക്കൾ, സസ്യങ്ങളുടെ ഉത്സവം, ഈസ്റ്റ് ഏഷ്യ ഫെസ്റ്റിവൽ, ഫുഡ് & ഡെസേർട്ട് ഫെസ്റ്റിവൽ, റമദാൻ ഫെസ്റ്റിവൽ എന്നിവ ഉൾപ്പെടുന്നു.
കാർഷിക നവീകരണത്തെ ഉത്തേജിപ്പിക്കാനും മികച്ച കർഷകരെയും കന്നുകാലി വളർത്തുന്നവരെയും ആഘോഷിക്കാനും ലക്ഷ്യമിട്ടുള്ള കാർഷിക മികവിനുള്ള ശൈഖ് മൻസൂർ ബിൻ സായിദ് അവാർഡും ഫെസ്റ്റിവലിൻ്റെ സവിശേഷതയാണ്. ഇത്തവണത്തെ ഫെസ്റ്റിവൽ ഹണി എക്സിബിഷന് ആതിഥേയത്വം വഹിക്കുന്നതാണ്. ഏറ്റവും മികച്ചതും അപൂർവവുമായ തേനുകൾ പ്രദർശിപ്പിക്കുകയും സന്ദർശകർക്ക് പങ്കെടുക്കുന്ന ബ്രാൻഡുകളിൽ നിന്ന് തേൻ വാങ്ങാനുള്ള അവസരങ്ങൾ പ്രദാനം ചെയ്യുകയും ചെയ്യുന്ന രീതിയിലാണ് ഹണി എക്സിബിഷൻ ഒരുക്കുന്നത്.
WAM
