ഈ വർഷത്തെ ഹിജ്റ പുതുവർഷ അവധി സംബന്ധിച്ച് കുവൈറ്റ് ക്യാബിനറ്റ് അറിയിപ്പ് നൽകി. 2026 ജൂൺ 10-നാണ് കുവൈറ്റ് ന്യൂസ് ഏജൻസി ഇക്കാര്യം റിപ്പോർട്ട് ചെയ്തത്.
#Kuwait Cabinet extends sincere congratulations and best wishes to His Highness the Amir Sheikh Meshal Al-Ahmad Al-Jaber Al-Sabah, and His Highness the Crown Prince Sheikh Sabah Khaled Al-Hamad Al-Sabah, as well as to the honorable Kuwaiti people and respected residents on the… pic.twitter.com/dw5ncoAVGf
— Kuwait News Agency – English Feed (@kuna_en) June 10, 2026
കുവൈറ്റ് ആക്ടിംഗ് പ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് സൗദ് അൽ-സബയുടെ അധ്യക്ഷതയിൽ 2026 ജൂൺ 10, ബുധനാഴ്ച ചേർന്ന കുവൈറ്റ് മന്ത്രിസഭാ യോഗത്തിലാണ് ഈ വർഷത്തെ ഔദ്യോഗിക ഹിജ്റ പുതുവർഷ അവധി ക്രമീകരണങ്ങൾ സംബന്ധിച്ച പ്രഖ്യാപനമുണ്ടായത്.
1447 AH-ലെ ദുൽ ഹജ്ജ് മാസം പൂർത്തിയാകുന്നതും, അടുത്ത മാസപ്പിറവി ദൃശ്യമാകുന്നതും അടിസ്ഥാനമാക്കി രണ്ട് സാധ്യമായ സാഹചര്യങ്ങൾ കുവൈറ്റ് കാബിനറ്റ് വിശദീകരിച്ചിട്ടുണ്ട്.
ദുൽ ഹജ്ജ് മാസം 29 ദിവസം കൊണ്ട് പൂർത്തിയാക്കുകയാണെങ്കിൽ, 2026 ജൂൺ 16, ചൊവ്വാഴ്ച ഇസ്ലാമിക പുതുവത്സര അവധി വരുന്നതാണ്. ഈ സാഹചര്യത്തിൽ കുവൈറ്റിലെ എല്ലാ മന്ത്രാലയങ്ങളിലും, സർക്കാർ ഏജൻസികളിലും, പൊതു സ്ഥാപനങ്ങളിലും, സ്ഥാപനങ്ങളിലും 2026 ജൂൺ 16 അവധിയായിരിക്കും. അവധിയ്ക്ക് ശേഷം 2026 ജൂൺ 17, ബുധനാഴ്ച പൊതുമേഖലയിലെ ഔദ്യോഗിക പ്രവർത്തനങ്ങൾ പുനരാരംഭിക്കുന്നതാണ്.
എന്നാൽ, ദുൽ ഹജ്ജ് മാസം 30 ദിവസം പൂർത്തിയാക്കുന്ന സാഹചര്യത്തിൽ 2026 ജൂൺ 17, ബുധനാഴ്ച കുവൈറ്റിലെ പൊതുമേഖലയിൽ ഔദ്യോഗിക ഹിജ്റ പുതുവർഷ അവധിയായി കണക്കാക്കുന്നതാണ്. ഈ സാഹചര്യത്തിൽ 2026 ജൂൺ 18, വ്യാഴാഴ്ചയും അവധിയായിരിക്കും. തുടർന്ന് ജൂൺ 19, 20 എന്നീ വാരാന്ത്യ അവധികൾക്ക് ശേഷം സർക്കാർ ഓഫീസുകൾ 2026 ജൂൺ 21, ഞായറാഴ്ചയായിരിക്കും വീണ്ടും തുറക്കുന്നത്.
