ഔദ് മേത്ത, അൽ അസയേൽ സ്ട്രീറ്റ് നവീകരണത്തിനായി 600 മില്യൺ ദിർഹം മൂല്യമുള്ള കരാർ അനുവദിച്ചതായി ദുബായ് അധികൃതർ വ്യക്തമാക്കി. 2024 ഒക്ടോബർ 13-നാണ് ദുബായ് റോഡ്സ് ആൻഡ് ട്രാൻസ്‌പോർട് അതോറിറ്റി (RTA) ഇക്കാര്യം അറിയിച്ചത്.
ഈ പദ്ധതിയുടെ ഭാഗമായി നാല് പ്രധാന ഇന്റർസെക്ഷനുകൾ, ആകെ 4300 മീറ്റർ നീളമുള്ള പാലങ്ങൾ, പതിനാല് കിലോമീറ്റർ നീളത്തിലുള്ള റോഡുകൾ എന്നിവ നിർമ്മിക്കുന്നതാണ്. ദുബായിലെ ഗതാഗതത്തിരക്ക് ഒഴിവാക്കുന്നതിനും, ട്രാഫിക് സുഗമമാക്കുന്നതിനും ലക്ഷ്യമിട്ടാണ് ഇത്.
ഷെയ്ഖ് റാഷിദ് കോറിഡോർ വികസന പദ്ധതിയിൽ ഉൾപ്പെടുത്തിയാണ് ഈ 600 മില്യൺ ദിർഹം മൂല്യമുള്ള കരാർ നടപ്പിലാക്കുന്നത്. അൽ അസയേൽ സ്ട്രീറ്റ്, അൽ ഖൈൽ റോഡ് എന്നിവയെ അൽ നവ്രാസ് സ്ട്രീറ്റിലൂടെ ബന്ധിപ്പിക്കുന്ന ഈ പദ്ധതി ഔദ് മേത്ത, അൽ നവ്രാസ് സ്ട്രീറ്റ് എന്നിവയിലേക്ക് എക്‌സിറ്റുകൾ നൽകുന്ന രീതിയിലാണ് രൂപകൽപ്പന ചെയ്തിരിക്കുന്നത്.
സബീൽ, അൽ ജദ്ദാഫ്, ഔദ് മേത്ത, ഉം ഹുറൈർ, ലത്തീഫ ഹോസ്പിറ്റൽ, അൽ വാസിൽ ക്ലബ് മുതലായ മേഖലകളിലേക്ക് ഈ പദ്ധതി സുഗമമായ ഗതാഗതം പ്രധാനം ചെയ്യുന്നതാണ്. 2030-ഓടെ ഈ പദ്ധതി നടപ്പിലാകുന്നതോടെ ഔദ് മേത്ത സ്ട്രീറ്റിലൂടെ മണിക്കൂറിൽ 15600 വാഹനങ്ങൾക്ക് (നിലവിൽ 10400 വാഹനങ്ങൾ) കടന്ന് പോകാനാകുന്നതാണ്.
ഈ റൂട്ടിലെ യാത്രാ സമയം ഇരുപത് മിനിറ്റിൽ നിന്ന് അഞ്ച് മിനിറ്റാക്കി വെട്ടിച്ചുരുക്കുന്നതിനും ഈ പദ്ധതി കാരണമാകുന്നതാണ്.
Cover Image: Dubai Media Office.
