മത്ര കേബിൾ കാർ 2026 നവംബർ 8-ന് പൊതുജനങ്ങൾക്ക് തുറന്ന് കൊടുത്തു. മസ്‌കറ്റ് തീരപ്രദേശത്തിന്റെ മനോഹരമായ കാഴ്ചകൾ വ്യത്യസ്തമായ രീതിയിൽ ആസ്വദിക്കുന്നതിന് മത്ര കേബിൾ കാർ അവസരമൊരുക്കുന്നു.
تذكرتك… بالطريقة اللي تناسبك 🚡✨ احجز عبر موقعنا، تطبيق الآيفون، أو أجهزة التذاكر في المحطة. نترقّبكم لتعيشوا التجربة 🤍 وتطبيق أندرويد قريبًا! https://t.co/5O2gpVKZPx
— Muttrah Teleferik تلفريك مطرح (@MuttrahT) November 8, 2026
ചരിത്രപ്രസിദ്ധമായ മത്ര തീരപ്രദേശം, പോർട്ട് സുൽത്താൻ ഖാബൂസ്, പരിസര പ്രദേശങ്ങൾ എന്നിവയുടെ വിശാലമായ കാഴ്ചകൾ സന്ദർശകർക്ക് സമ്മാനിക്കുന്ന മത്ര കേബിൾ കാർ മത്ര സൂഖിലും തീരപ്രദേശത്തും വാണിജ്യ പ്രവർത്തനങ്ങൾ സജീവമാക്കാൻ സഹായകമാകുന്നതാണ്.
ടിക്കറ്റ് നിരക്കുകൾ:
- മുതിർന്ന ഒമാനി പൗരന്മാർ, റെസിഡൻസി വിസകളിലുള്ള താമസക്കാർ – 8.400 ഒമാനി റിയാൽ*.
- 2 മുതൽ 11 വയസ്സുവരെയുള്ള കുട്ടികൾക്ക് – 4.200 ഒമാനി റിയാൽ*.
- മുതിർന്ന വിനോദസഞ്ചാരികൾക്ക് – 10.800 ഒമാനി റിയാൽ,
- വിനോദസഞ്ചാരികളായ 2 മുതൽ 11 വയസ്സുവരെയുള്ള കുട്ടികൾക്ക് – 5.040 ഒമാനി റിയാൽ.
- 12 വയസ്സും അതിൽ കൂടുതലുമുള്ളവർക്ക് മുതിർന്നവരുടെ നിരക്കാണ് ബാധകമാകുക.
- 2 വയസ്സിൽ താഴെയുള്ള കുട്ടികൾക്ക് സൗജന്യമായി യാത്ര ചെയ്യാം.
- VIP ക്യാബിനുകളിൽ മുതിർന്നവർക്കും 2 വയസ്സും അതിൽ കൂടുതലുമുള്ള കുട്ടികൾക്കും ഒരാൾക്ക് 30 ഒമാനി റിയാൽ വീതമാണ് നിരക്ക്. ഈ വിഭാഗത്തിലും 2 വയസ്സിൽ താഴെയുള്ള കുട്ടികൾക്ക് സൗജന്യം.
*ഈ നിരക്കുകൾ ലഭിക്കുന്നതിന് സന്ദർശകർ തിരിച്ചറിയൽ രേഖ ഹാജരാക്കേണ്ടതുണ്ട്.
ടിക്കറ്റുകൾ ഈ പദ്ധതിയുടെ മൊബൈൽ ആപ്പിലൂടെയും, കേബിൾ കാർ സ്റ്റേഷനുകളിലെ ടിക്കറ്റ് കിയോസ്കുകളിലൂടെയും ലഭ്യമാണ്.
ഈ പദ്ധതിയുടെ സോഫ്റ്റ് ഓപ്പണിംഗ് ഘട്ടത്തിൽ ഞായറാഴ്ച മുതൽ ബുധനാഴ്ച വരെ ഉച്ചയ്ക്ക് 1 മണി മുതൽ രാത്രി 8 മണി വരെയും (ടിക്കറ്റ് വിൽപ്പനയും ബോർഡിംഗും വൈകുന്നേരം 7 മണിക്ക് അവസാനിക്കും), വ്യാഴാഴ്ച മുതൽ ശനിയാഴ്ച വരെ ഉച്ചയ്ക്ക് 3 മണി മുതൽ രാത്രി 10 മണി വരെയും (ടിക്കറ്റ് വിൽപ്പനയും ബോർഡിംഗും രാത്രി 9 മണിക്ക് അവസാനിക്കും) സേവനങ്ങൾ ലഭ്യമാക്കുന്നതാണ്.
മൂന്ന് സ്റ്റേഷനുകളുള്ള മത്ര കേബിൾ കാർ പദ്ധതിയിൽ 2 VIP ക്യാബിനുകൾ ഉൾപ്പടെ ആകെ 18 ക്യാബിനുകൾ ഉണ്ടായിരിക്കുന്നതാണ്. ഓരോ ക്യാബിനിലും 10 യാത്രികർക്ക് വീതം സഞ്ചരിക്കാവുന്നതാണ്. മണിക്കൂറിൽ 800 യാത്രക്കാരെ വഹിക്കാനുള്ള ശേഷിയുണ്ട് ഈ പദ്ധതിക്ക്.
മത്ര ഫിഷ് മാർക്കറ്റിനും മത്ര വാട്ടർഫ്രണ്ട് പ്രോജക്റ്റിനും ഇടയിലുള്ള പോർട്ട് സ്റ്റേഷനിൽ നിന്നാണ് ഈ കേബിൾ കാർ റൂട്ട് ആരംഭിക്കുന്നത്. മത്ര സൂഖിനും ക്രൂയിസ് ഷിപ്പ് ടെർമിനലിനും സമീപം സ്ഥിതി ചെയ്യുന്ന ഈ സ്റ്റേഷൻ സന്ദർശകർക്കും ക്രൂയിസ് കപ്പൽ യാത്രക്കാർക്കും വേണ്ടിയുള്ള പ്രധാന കേന്ദ്രമായി പ്രവർത്തിക്കുന്നതാണ്.
പോർട്ട് സ്റ്റേഷനിൽ നിന്ന് മത്ര കോട്ടയ്ക്കും അൽ റിയാം പാർക്കിനും ഇടയിൽ സ്ഥിതി ചെയ്യുന്ന സമ്മിറ്റ് സ്റ്റേഷനിലേക്ക് ബന്ധിപ്പിക്കുന്ന രീതിയിലാണ് ഈ കേബിൾ കാർ റൂട്ട് ഒരുക്കിയിരിക്കുന്നത്. തുടർന്ന് മസ്‌കറ്റ് ഗേറ്റിന് സമീപമുള്ള അൽ റിയാം പാർക്കിനുള്ളിലെ ഹേ അൽ വാർഡ് സ്റ്റേഷനിൽ ഈ കേബിൾ കാർ റൂട്ട് അവസാനിക്കുന്നു.
Cover Image: muttrahteleferik.com
