കുവൈറ്റ് ഇന്റർനാഷണൽ എയർപോർട്ടിൽ നിന്നുള്ള വ്യോമയാന സേവനങ്ങൾ 2021 ജനുവരി 2, ശനിയാഴ്ച്ച മുതൽ പുനരാരംഭിക്കുമെന്ന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) വ്യക്തമാക്കി. ഡിസംബർ 29, ചൊവ്വാഴ്ച്ചയാണ് DGCA ഇത് സംബന്ധിച്ച ഔദ്യോഗിക അറിയിപ്പ് പുറത്തിറക്കിയത്.
2021 ജനുവരി 1 വരെ രാജ്യത്തിന്റെ അതിർത്തികൾ അടച്ചിടാനുള്ള തീരുമാനം നീട്ടേണ്ടതില്ലെന്ന് കുവൈറ്റ് ക്യാബിനറ്റ് ഡിസംബർ 28-ന് തീരുമാനിച്ചിരുന്നു. 2021 ജനുവരി 1, വെള്ളിയാഴ്ച്ച മുതൽ കുവൈറ്റിലേക്കും, തിരികെയുമുള്ള അന്താരാഷ്ട്ര വ്യോമയാന സേവനങ്ങൾ പുനരാരംഭിക്കുമെന്നാണ് ക്യാബിനറ്റ് തീരുമാനപ്രകാരം മിനിസ്ട്രി ഓഫ് ഇൻഫർമേഷൻ ആദ്യം അറിയിച്ചിരുന്നത്.
എന്നാൽ, കുവൈറ്റ് DGCA പുറത്തിറക്കിയ ഡിസംബർ 29-ലെ ഔദ്യോഗിക അറിയിപ്പ് പ്രകാരം കുവൈറ്റ് ഇന്റർനാഷണൽ എയർപോർട്ടിൽ നിന്നുള്ള വ്യോമയാന സേവനങ്ങൾ 2021 ജനുവരി 2, ശനിയാഴ്ച്ച പ്രാദേശിക സമയം 4:00 pm മുതൽ പുനരാരംഭിക്കുന്നതാണ്. സ്ഥിതിഗതികൾ വിലയിരുത്തിയ ശേഷം ആവശ്യമെങ്കിൽ തീരുമാനങ്ങളിൽ മാറ്റങ്ങൾ വരാമെന്നും അധികൃതർ വ്യക്തമാക്കിയിട്ടുണ്ട്.
രാജ്യത്തിന്റെ കര, കടൽ അതിർത്തികൾ ജനുവരി 2 മുതൽ തുറക്കാനും കുവൈറ്റ് ക്യാബിനറ്റ് തീരുമാനിച്ചിട്ടുണ്ട്. ദിനവും രാവിലെ 9 മുതൽ വൈകീട്ട് 3 വരെയാണ് കര, കടൽ അതിർത്തികളിലൂടെ പ്രവേശനം അനുവദിക്കുന്നതെന്നാണ് ലഭിക്കുന്ന വിവരം. യു കെയിൽ COVID-19 വൈറസിന്റെ പുതിയ വകഭേദം കണ്ടെത്തിയ സാഹചര്യത്തിലാണ് ഡിസംബർ 21 മുതൽ 2021 ജനുവരി 1 വരെ രാജ്യത്തിന്റെ അതിർത്തികൾ അടയ്ക്കാൻ കുവൈറ്റ് തീരുമാനിച്ചത്.
