എമിറേറ്റിലെ പ്രധാന റോഡുകളിൽ ജൂൺ 28, ഞായറാഴ്ച്ച മുതൽ, ഗതാഗതത്തിരക്ക് ഏറ്റവും കൂടുതൽ അനുഭവപ്പെടുന്ന സമയങ്ങളിൽ ഭാരമേറിയ വാഹനങ്ങളും, ട്രക്കുകളും പ്രവേശിക്കുന്നത് വിലക്കിയതായി അബുദാബി പോലീസ് അറിയിച്ചു. ഇന്ന് (ജൂൺ 27) രാവിലെയാണ് അബുദാബി പോലീസ്, ഗതാഗത വകുപ്പുമായി ചേർന്ന് ഇത് സംബന്ധിച്ച അറിയിപ്പുകൾ നൽകിയത്.
അബുദാബി നഗരപരിധിയിൽ രാവിലെ 6.30 മുതൽ രാവിലെ 9 മണി വരെയും, വൈകീട്ട് 3 മുതൽ 6 വരെയും ഇത്തരം വലിയ വാഹനങ്ങളുടെ നീക്കം അനുവദിക്കില്ല. അൽ ഐൻ നഗരപരിധിയിൽ രാവിലെ 6.30 മുതൽ രാവിലെ 8:30 വരെയും, വൈകീട്ട് 2 മുതൽ 4 വരെയുമാണ് നിയന്ത്രണങ്ങൾ ഏർപെടുത്തിയിരിക്കുന്നത്.
ഈ സമയങ്ങളിൽ പ്രധാനപാതകൾ ഉപയോഗിക്കരുതെന്ന് ട്രക്ക് ഡ്രൈവർമാരോട് അബുദാബി പോലീസ് ആവശ്യപെട്ടിട്ടുണ്ട്. ട്രക്ക് ഗതാഗതം അനുവദിച്ചിട്ടില്ലാത്ത പാതകൾ ഒഴിവാക്കാനും ഇത്തരം വലിയ വാഹനങ്ങളോട് അധികൃതർ ആവശ്യപ്പെട്ടിട്ടുണ്ട്.
