COVID-19: ഇന്ത്യയിലേക്കുള്ള യാത്രകൾക്ക് ബാധകമായ ഔദ്യോഗിക യാത്രാ നിർദ്ദേശങ്ങൾ

രാജ്യത്ത് വീണ്ടും കൊറോണ വൈറസ് ബാധകൾ റിപ്പോർട്ട് ചെയ്ത സാഹചര്യത്തിൽ കേന്ദ്ര ആരോഗ്യ മന്ത്രാലയം പുതുക്കിയ യാത്രാ നിർദ്ദേശങ്ങൾ നൽകി.

മാർച്ച് 3-നു പുറത്തിറക്കിയ ഈ നിർദ്ദേശങ്ങൾ പ്രകാരം:

ഇറ്റലി, ഇറാൻ, ദക്ഷിണ കൊറിയ, ജപ്പാൻ എന്നീ രാജ്യങ്ങളിലെ പൗരന്മാർക്ക് മാർച്ച് 3-നോ അതിനു മുൻപോ അനുവദിച്ചിട്ടുള്ള എല്ലാ വിസ/ ഇ-വിസകളും നിലവിൽ റദ്ദാക്കിയിട്ടുണ്ട്. ഒഴിവാക്കാനാകാത്ത സാഹചര്യങ്ങളാൽ ഇന്ത്യയിലേക്ക് പ്രവേശിക്കേണ്ട ഈ രാജ്യങ്ങളിൽ നിന്നുള്ളവർക്ക് അടുത്തുള്ള ഇന്ത്യൻ എംബസ്സിയിൽ നിന്ന് പുതിയ വിസയ്ക്ക് അപേക്ഷിക്കാവുന്നതാണ്.
ഫെബ്രുവരി 5-നു മുന്നേ ഉള്ള ചൈനീസ് പൗരന്മാർക്കുള്ള വിസകൾ റദ്ദാക്കിയ നടപടി തുടരും.
ഫെബ്രുവരി 1-നോ അതിനു ശേഷമോ ചൈന, ഇറാൻ, ഇറ്റലി, ദക്ഷിണ കൊറിയ, ജപ്പാൻ എന്നീ രാജ്യങ്ങൾ സന്ദർശിച്ച വിദേശപൗരന്മാർക്ക് അനുവദിച്ചിട്ടുള്ള എല്ലാ വിസ/ ഇ-വിസകളും നിലവിൽ റദ്ദാക്കിയിട്ടുണ്ട്.
മുന്നേ പറഞ്ഞ രാജ്യങ്ങളിൽ നിന്നുള്ള നയതന്ത്രജ്ഞർ, യു എൻ ഉദ്യോഗസ്ഥർ, ഒ സി ഐ കാർഡ് ഉള്ളവർ, വിമാനജോലിക്കാർ എന്നിവരെ ഈ യാത്രാ വിലക്കുകളിൽ നിന്ന് ഒഴിവാക്കിയിട്ടുണ്ടെങ്കിലും അവരെ ആരോഗ്യ സൂക്ഷമപരിശോധനകൾക്ക് വിധേയരാക്കുന്നതായിരിക്കും.
ഇന്ത്യയിലേക്ക് പ്രവേശിക്കുന്ന എല്ലാ അന്താരാഷ്‌ട്ര വിമാന സർവീസുകളിലെയും യാത്രക്കാർ നിർദിഷ്ട ഫോമിൽ പേര്, രാജ്യത്തിനകത്തെ വിലാസം, ഫോൺ നമ്പർ മുതലായ വിവരങ്ങളും, യാത്രാ വിവരങ്ങളും ആരോഗ്യ സുരക്ഷാ ഉദ്യോഗസ്ഥർക്കും, ഇമ്മിഗ്രേഷന്‍ അധികൃതർക്കും നൽകേണ്ടതാണ്.
ചൈന, ദക്ഷിണ കൊറിയ, ജപ്പാൻ, ഇറാൻ, ഇറ്റലി, ഹോങ്കോങ്, മക്കാവു, വിയറ്റ്നാം, മലേഷ്യ, ഇന്തോനേഷ്യ, നേപ്പാൾ, തായ്‌ലൻഡ്, സിംഗപ്പൂർ, തായ്‌വാൻ എന്നിവിടങ്ങളിൽ നിന്ന് നേരിട്ടോ അല്ലാതെയോ വരുന്ന വിദേശികളും ഇന്ത്യാക്കാരുമായുള്ള എല്ലാ യാത്രികരെയും ആരോഗ്യ സുരക്ഷാ സൂക്ഷ്മപരിശോധനകൾക്ക് വിധേയരാക്കുന്നതായിരിക്കും.
ചൈന, ഇറ്റലി, ഇറാൻ, ദക്ഷിണ കൊറിയ എന്നിവിടങ്ങളിലേക്കുള്ള യാത്രകളിൽ നിന്നും COVID-19 ബാധയുള്ള രാജ്യങ്ങളിലേക്കുള്ള അത്യാവശ്യമല്ലാത്ത യാത്രകളിൽ നിന്നും ഒഴിഞ്ഞുനിൽക്കാൻ നിർദ്ദേശിക്കുന്നുണ്ട്.