ദുബായിലെ എല്ലാ പൊതു പാർക്കിങ്ങ് ഇടങ്ങളിലും (ബഹുനില പാർക്കിങ്ങ് സംവിധാനങ്ങൾ ഒഴികെ) ജൂലൈ 30, വ്യാഴാഴ്ച്ച മുതൽ 2020 ഓഗസ്റ്റ് 2, ഞായറാഴ്ച്ച വരെ വാഹന പാർക്കിങ്ങ് സൗജന്യമാക്കിയതായി റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. ഈദുൽ അദ്ഹ അവധി ദിനങ്ങളുമായി ബന്ധപ്പെട്ടാണ് പാർക്കിങ്ങ് സൗജന്യമാക്കുന്നത്.
ഓഗസ്റ്റ് 3, തിങ്കളാഴ്ച്ച മുതൽ പാർക്കിങ്ങ് ഫീസ് പുനരാരംഭിക്കുന്നതാണ്. ബഹുനില പാർക്കിങ്ങ് സംവിധാനങ്ങളിൽ ഈ സൗജന്യ പാർക്കിങ്ങ് സേവനം ലഭ്യമാക്കിയിട്ടില്ലാ എന്ന് RTA വ്യക്തമാക്കിയിട്ടുണ്ട്.
ഈദുൽ അദ്ഹ അവധി ദിനങ്ങളുമായി ബന്ധപ്പെട്ട്, ജൂലൈ 30, വ്യാഴാഴ്ച്ച മുതൽ 2020 ഓഗസ്റ്റ് 3, തിങ്കളാഴ്ച്ച രാവിലെ 7.59 വരെ അബുദാബിയിലെ പൊതു പാർക്കിങ്ങ് സംവിധാനങ്ങൾ സൗജന്യമാക്കിയതായി ഇന്റഗ്രേറ്റഡ് ട്രാൻസ്‌പോർട്ട് സെന്റർ (ITC) നേരത്തെ അറിയിച്ചിരുന്നു.
