എമിറേറ്റിൽ നിർമ്മാണം പൂർത്തിയാക്കിയ എയർ ടാക്സി സ്റ്റേഷൻ ദുബായ് കിരീടാവകാശിയും, യു എ ഇ ഡെപ്യൂട്ടി പ്രധാനമന്ത്രിയും, പ്രതിരോധ മന്ത്രിയുമായ H.H. ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അവലോകനം ചെയ്തു. 2026 ഏപ്രിൽ 16-നാണ് എമിറേറ്റ്സ് ന്യൂസ് ഏജൻസി ഇക്കാര്യം റിപ്പോർട്ട് ചെയ്തത്.
Hamdan bin Mohammed reviews newly completed Air Taxi Station near Dubai International Airport, the first facility of its kind in the world.@rta_dubai I @jobyaviation I @Skyports_Infra pic.twitter.com/5agxJPKj7f
— Dubai Media Office (@DXBMediaOffice) April 16, 2026
ദുബായ് അന്താരാഷ്ട്ര വിമാനത്താവളത്തിന് സമീപത്തായാണ് ഈ എയർ ടാക്സി സ്റ്റേഷൻ നിർമ്മിച്ചിരിക്കുന്നത്. ദുബായിലെ ആദ്യത്തെ എയർ ടാക്സി സ്റ്റേഷനാണിത്.
വെർട്ടിപോർട്ട് അടിസ്ഥാന സൗകര്യങ്ങളുടെ വികസനമേഖലയിൽ പ്രവർത്തിക്കുന്ന സ്കൈപോർട്ട്സ് ഇൻഫ്രാസ്ട്രക്ചറാണ് ഈ വെർട്ടിപോർട്ട് സ്റ്റേഷൻ നിർമ്മാണ, നടത്തിപ്പ് പദ്ധതിയ്ക്ക് നേതൃത്വം നൽകുന്നത്.
3100 സ്ക്വയർ മീറ്റർ വിസ്തൃതിയിൽ നാല് നിലകളിൽ ഒരുക്കിയിട്ടുള്ള ഈ വെർട്ടിപോർട്ടിൽ ഏരിയൽ ടാക്സി വിമാനങ്ങൾക്ക് പൊങ്ങുന്നതിനും, ഇറങ്ങുന്നതിനുമുള്ള വ്യത്യസ്ത സോണുകൾ ഉണ്ടായിരിക്കുന്നതാണ്.
രണ്ട് ലെവൽ കാർ പാർക്ക്, രണ്ട് ഏരിയൽ ടാക്സി ടേക്ക്-ഓഫ്, ലാൻഡിംഗ് പാഡുകൾ, എയർ ടാക്സി വിമാനങ്ങൾ ചാർജ്ജ് ചെയ്യുന്നതിനുള്ള സൗകര്യങ്ങൾ, ഏരിയൽ ടാക്സി പാർക്കിംഗ് ഏരിയ എന്നിവയും ഈ സ്റ്റേഷൻ കെട്ടിടത്തിൽ ഒരുക്കിയിട്ടുണ്ട്. വാർഷികാടിസ്ഥാനത്തിൽ ഏതാണ്ട് 170000 യാത്രികർക്ക് യാത്രാ സേവനങ്ങൾ നൽകാനാകുന്ന രീതിയിലാണ് ഈ വെർട്ടിപോർട്ട് നിർമ്മിച്ചിരിക്കുന്നത്.
ഉയർന്ന അന്താരാഷ്ട്ര സുരക്ഷാ മാനദണ്ഡങ്ങൾക്കനുസൃതമായാണ് ഈ എയർ ടാക്സി സ്റ്റേഷൻ വികസിപ്പിച്ചിരിക്കുന്നത്.
വ്യോമയാന ടാക്സി സേവന സംവിധാനങ്ങളുടെ നിർമ്മാതാക്കളായ ജോബി ഏവിയേഷൻ കമ്പനിക്കാണ് ഈ എയർ ടാക്സി സേവനങ്ങൾക്ക് ആവശ്യമായ വിമാനങ്ങൾ നിർമ്മിക്കുന്നതിനും, അവ പ്രവർത്തിപ്പിക്കുന്നതിനും, യാത്രികർക്ക് ആവശ്യമായ സേവനങ്ങൾ നൽകുന്നതിനുമുള്ള ചുമതല.
ഈ പദ്ധതിയുമായി ബന്ധപ്പെട്ട പ്രവർത്തനങ്ങളുടെ ഭരണ ചുമതല, മറ്റു ഗതാഗത ശൃംഖലകളുമായുള്ള സംയോജനം തുടങ്ങിയവായുടെ മേൽനോട്ടം ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റിയാണ് (RTA) വഹിക്കുന്നത്. ആദ്യത്തെ വെർട്ടിപോർട്ടിന്റെ നിർമ്മാണം പൂർത്തിയാക്കിയതോടെ ദുബായിൽ എയർ ടാക്സി സേവനങ്ങൾ വാണിജ്യാടിസ്ഥാനത്തിൽ ആരംഭിക്കുന്നതിലേക്ക് ഒരു പടികൂടി അടുത്തതായി RTA ഡയറക്ടർ ജനറൽ മത്തർ അൽ തയർ അറിയിച്ചു.
ദുബായ് ഇന്റർനാഷണൽ എയർപോർട്ടിന് പുറമെ ഡൗൺടൗൺ ദുബായ്, ദുബായ് മറീന, പാം ജുമേയറാഹ് എന്നിവിടങ്ങളിലും ആദ്യ ഘട്ടത്തിൽ ഇത്തരം വെർട്ടിപോർട്ടുകൾ നിർമ്മിക്കുന്നതാണ്.
WAM
