ഗ്ലോബൽ വില്ലേജിലെ ഏറ്റവും ജനപ്രീതിയുള്ള പ്രദർശനയിനമായ കരിമരുന്ന് പ്രയോഗങ്ങൾ 2021 മാർച്ച് 4, വ്യാഴാഴ്ച്ച മുതൽ പുനരാരംഭിക്കുമെന്ന് അധികൃതർ വ്യക്തമാക്കി. കൊറോണ വൈറസ് വ്യാപനം തടയുന്നതിനായി പ്രതിരോധ നടപടികൾ കർശനമാക്കാനുള്ള ദുബായ് സർക്കാരിന്റെ നയത്തിന്റെ ഭാഗമായി ഫെബ്രുവരി 3 മുതൽ ഗ്ലോബൽ വില്ലേജിലെ മ്യൂസിക്കൽ കരിമരുന്ന് പ്രയോഗം താത്‌കാലികമായി നിർത്തിവെച്ചിരുന്നു.
ഗ്ലോബൽ വില്ലേജിൽ വിവിധ വിനോദപ്രകടനങ്ങളും, തെരുവുകളിൽ നടത്തുന്ന കലാപരിപാടികളും താത്‌കാലികമായി നിർത്തലാക്കാനും ഫെബ്രുവരി 3-ന് അധികൃതർ തീരുമാനിച്ചിരുന്നു. ഇതിൽ കരിമരുന്ന് പ്രയോഗങ്ങൾ മാർച്ച് 4 മുതൽ പുനരാരംഭിക്കുമെന്ന് ഗ്ലോബൽ വില്ലേജ് അധികൃതർ പ്രത്യേക പത്രക്കുറിപ്പിലൂടെ അറിയിച്ചു.
ഈ വർഷത്തെ ഗ്ലോബൽ വില്ലേജിന്റെ ബാക്കിയുള്ള ദിനങ്ങളിൽ വെടിക്കെട്ടിനുള്ള അനുമതി തുടരുമെന്നാണ് പ്രതീക്ഷിക്കുന്നതെന്നും അധികൃതർ കൂട്ടിച്ചേർത്തു. ദിനവും വൈകീട്ട് 4 മണിമുതൽ ഗ്ലോബൽ വില്ലേജിലേക്ക് സന്ദർശകർക്ക് പ്രവേശനം അനുവദിക്കുന്നതാണ്. നിലവിൽ നടന്നു കൊണ്ടിരിക്കുന്ന ഗ്ലോബൽ വില്ലേജ് സീസൺ ഏപ്രിൽ 18-ന് അവസാനിക്കുന്നതാണ്.
