2022 മാർച്ച് 4, വെള്ളിയാഴ്ച്ച സബാഹ് അൽ അഹ്മദ് കോറിഡോറിലെ ഹലോൾ ഇന്റർചേഞ്ചിൽ എട്ട് മണിക്കൂർ നേരത്തേക്ക് ഗതാഗത നിയന്ത്രണം ഏർപ്പെടുത്തുമെന്ന് ഖത്തർ പബ്ലിക് വർക്സ് അതോറിറ്റി അറിയിച്ചു. 2022 മാർച്ച് 2-നാണ് ഖത്തർ പബ്ലിക് വർക്സ് അതോറിറ്റി ഇത് സംബന്ധിച്ച അറിയിപ്പ് നൽകിയത്.
ഈ അറിയിപ്പ് പ്രകാരം മാർച്ച് 4-ന് പുലർച്ചെ 2 മണിമുതൽ രാവിലെ 10 മണിവരെയാണ് ഈ ഗതാഗത നിയന്ത്രണം ഏർപ്പെടുത്തുന്നത്. ഹമദ് ഇന്റർനാഷണൽ എയർപോർട്ടിൽ നിന്ന് സൽവ റോഡിലേക്ക് സഞ്ചരിക്കുന്ന ഭാഗത്താണ് ഈ നിയന്ത്രണം.
ജനറൽ ഡയറക്ടറേറ്റ് ഓഫ് ട്രാഫിക്കുമായി ചേർന്നാണ് അതോറിറ്റി ഈ ഗതാഗത നിയന്ത്രണം ഏർപ്പെടുത്തുന്നത്. റോഡ് അടച്ചിടുന്ന സമയത്ത് ഹമദ് ഇന്റർനാഷണൽ എയർപോർട്ടിൽ നിന്ന് ഹലോൾ ഇന്റർചേഞ്ചിലൂടെ സൽവ റോഡിലേക്ക് സഞ്ചരിക്കുന്നവർ ഇന്റർചേഞ്ചിൽ നിന്ന് വലത്തോട്ട് തിരിയേണ്ടതാണെന്നും തുടർന്ന് ഖലീഫ അൽ അത്തിയ ഇന്റർചേഞ്ചിലൂടെ സൽവ റോഡിലേക്ക് പ്രവേശിക്കേണ്ടതാണെന്നും അതോറിറ്റി അറിയിച്ചു.
