രാജ്യത്തെ COVID-19 പ്രതിരോധത്തിന്റെ മുന്നണിയിലെ പ്രവർത്തകരെ ആദരിക്കുന്നതിനായി പുറത്തിറക്കിയ പ്രത്യേക സ്മാരക സ്റ്റാമ്പുകൾ ഇപ്പോൾ ലഭ്യമാണെന്ന് ഖത്തർ പോസ്റ്റ് അറിയിച്ചു. 2022 ഓഗസ്റ്റ് 5-നാണ് ഖത്തർ പോസ്റ്റ് ഇക്കാര്യം അറിയിച്ചത്.
ഈ സ്റ്റാമ്പുകൾ ഖത്തർ പോസ്റ്റിന്റെ വിവിധ ബ്രാഞ്ചുകളിൽ നിന്നോ, ഓൺലൈൻ സ്റ്റോറിൽ നിന്നോ ലഭ്യമാണെന്നാണ് ഖത്തർ പോസ്റ്റ് അറിയിപ്പിൽ വ്യക്തമാക്കുന്നത്. കൊറോണ വൈറസ് പ്രതിരോധ മുന്നണിപോരാളികളുടെ മഹത്തായ സേവനങ്ങളെ അംഗീകരിക്കുന്നതിനായാണ് ഖത്തർ പോസ്റ്റ് രണ്ട് പ്രത്യേക സ്മാരക സ്റ്റാമ്പുകൾ പുറത്തിറക്കിയിരിക്കുന്നത്.
3.50 റിയാൽ വീതം മൂല്യമുള്ള ഈ രണ്ട് സ്റ്റാമ്പുകൾക്കൊപ്പം, പ്രത്യേക ഫസ്റ്റ് ഡേ കവറുകൾ, ഫോൾഡർ എന്നിവയും ഖത്തർ പോസ്റ്റ് പുറത്തിറക്കിയിട്ടുണ്ട്. ഡോക്ടർ, നേഴ്സ്, മറ്റു ആരോഗ്യ പ്രവർത്തകർ, പോലീസ്, മിലിറ്ററി, പോസ്റ്റൽ പ്രവർത്തകർ തുടങ്ങി ഖത്തറിലെ കൊറോണ വൈറസ് പ്രതിരോധ ശ്രമങ്ങളിൽ അണിചേർന്ന വിവിധ മേഖലകളിലെ പോരാളികളെ ഈ സ്റ്റാമ്പുകൾ ആദരിക്കുന്നു.
“നിങ്ങളുടെ പ്രയത്നങ്ങൾ എന്നേക്കുമായി ഞങ്ങളുടെ ജീവിതത്തിൽ മുദ്രണം ചെയ്തിരിക്കുന്നു”, ഈ സ്മാരക സ്റ്റാമ്പുകൾ അവതരിപ്പിച്ച് കൊണ്ട് ഖത്തർ പോസ്റ്റ് അറിയിച്ചു.
COVID-19 മുന്നണി പോരാളികളെ ആദരിക്കുന്നതിനായി യു എ ഇ, കുവൈറ്റ്, സൗദി അറേബ്യ, ഒമാൻ എന്നീ രാജ്യങ്ങളും നേരത്തെ പ്രത്യേക സ്മാരക സ്റ്റാമ്പുകൾ പുറത്തിറക്കിയിരുന്നു.
Cover Image: Qatar Post.
