സൗദി അറേബ്യയെയും, ഒമാനെയും നേരിട്ട് ബന്ധിപ്പിക്കുന്ന എംറ്റി ക്വാർട്ടർ ഹൈവേയുടെ ഒമാൻ അതിർത്തിക്കുള്ളിൽ സ്ഥിതി ചെയ്യുന്ന ഭാഗങ്ങളിൽ അറ്റകുറ്റപ്പണികൾ നടത്തുന്നതായി മിനിസ്ട്രി ഓഫ് ട്രാൻസ്‌പോർട്ട്, കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്‌നോളജി അറിയിച്ചു. 2022 ഏപ്രിൽ 7-നാണ് അധികൃതർ ഇക്കാര്യം അറിയിച്ചത്.
എംറ്റി ക്വാർട്ടർ ഹൈവേയുടെ ഇബ്രി വിലായത്തിലെ തമാം റൌണ്ട് എബൗട്ട് മുതൽ എംറ്റി ക്വാർട്ടർ ക്രോസിംഗ് വരെയുള്ള മേഖലയിലാണ് ഒമാൻ അറ്റകുറ്റപ്പണികൾ നടത്തുന്നത്. 148 കിലോമീറ്റർ നീളമുള്ള ഈ മേഖലയിൽ റോഡിലെ അടയാള ചിഹ്നങ്ങൾ പുതുക്കി വരയ്ക്കുക, വഴിയടയാള ബോർഡുകൾ പുനഃസ്ഥാപിക്കുക, റോഡിനു ഇരുവശത്തുമുള്ള റിഫ്ളക്ടറുകൾ പുനഃസ്ഥാപിക്കുക തുടങ്ങിയ അറ്റകുറ്റപ്പണികളാണ് മന്ത്രാലയം നടത്തുന്നത്.
സൗദി അറേബ്യയെയും, ഒമാനെയും നേരിട്ട് ബന്ധിപ്പിക്കുന്ന എംറ്റി ക്വാർട്ടർ മരുഭൂമിയിലൂടെയുള്ള ഈ ഹൈവേ 2021 ഡിസംബർ 7-നാണ് ഉദ്‌ഘാടനം ചെയ്തത്. ലോകത്ത് തന്നെ ഏറ്റവും ദുഷ്കരമായ ഏതാനം ഭൂപ്രദേശങ്ങളിലൂടെയാണ് ഈ പാത കടന്ന് പോകുന്നത്.
ലോകത്തിലെ ഏറ്റവും വലിയ മണൽ മരുഭൂമികളിലൊന്നായ റുബഉൽ ഖാലി (എംറ്റി ക്വാർട്ടർ) മരുഭൂമിയിലൂടെ കടന്ന് പോകുന്ന ഈ ഹൈവേ ഇരുരാജ്യങ്ങൾക്കിടയിലുമുള്ള കരമാർഗ്ഗമുള്ള യാത്രാ സമയത്തിൽ 16 മണിക്കൂർ കുറവ് വരുത്തുന്നതാണ്. ഈ ഹൈവേയുടെ 580 കിലോമീറ്റർ സൗദി അറേബ്യയിലും, 160 കിലോമീറ്റർ ഒമാനിലും സ്ഥിതി ചെയ്യുന്നു.
