ഒമാനിലെ ഈ വർഷത്തെ ഹിജ്‌റ പുതുവർഷപ്പിറവി 2021 ഓഗസ്റ്റ് 10, ചൊവ്വാഴ്ച്ചയായിരിക്കുമെന്ന് മിനിസ്ട്രി ഓഫ് റിലീജിയസ് ആൻഡ് എൻഡോവ്മെന്റ് അഫയേഴ്‌സ് (MERA) അറിയിച്ചു. ഓഗസ്റ്റ് 8-ന് രാത്രിയാണ് MERA ഇത് സംബന്ധിച്ച അറിയിപ്പ് നൽകിയത്.
2021 ഓഗസ്റ്റ് 8, ഞായറാഴ്ച്ച മാസപ്പിറവി ദൃശ്യമാകാത്തതിനെ തുടർന്ന്, ഓഗസ്റ്റ് 9, തിങ്കളാഴ്ച്ച ദുൽ ഹജ്ജിലെ അവസാന ദിനമായിരിക്കുമെന്നും, 2021 ഓഗസ്റ്റ് 10, ചൊവ്വാഴ്ച്ച മുഹറത്തിലെ ആദ്യ ദിനമായി കണക്കാക്കുമെന്നും MERA വ്യക്തമാക്കി. ഇതോടെ ഓഗസ്റ്റ് 2-ന് ഒമാൻ തൊഴിൽ മന്ത്രാലയം പുറത്തിറക്കിയ അറിയിപ്പ് പ്രകാരം, 2021 ഓഗസ്റ്റ് 10, ചൊവ്വാഴ്ച്ച ഒമാനിലെ ഈ വർഷത്തെ ഹിജ്‌റ പുതുവർഷ അവധിദിനമായി കണക്കാക്കുന്നതാണ്.
ഇസ്ലാമിക പുതുവത്സരത്തിന്റെ ആരംഭത്തെ കുറിക്കുന്ന ഈ അവസരത്തിലെ അവധി, മുഹറം മാസപ്പിറവി ദൃശ്യമാകുന്നതിന്റെ അടിസ്ഥാനത്തിലായിരിക്കുമെന്നും, മുഹറം ഒന്നിന് രാജ്യത്തെ പൊതു, സ്വകാര്യ മേഖലകളിൽ ഔദ്യോഗികമായി അവധിയായിരിക്കുമെന്നും ഒമാൻ തൊഴിൽ മന്ത്രാലയം നേരത്തെ അറിയിച്ചിരുന്നു.
