കൊറോണാ വൈറസ് വ്യാപനം തടയാൻ രാജ്യത്ത് നടപ്പിലാക്കിയ 21 ദിവസത്തെ ലോക്ക്ഡൌൺ മെയ് 3 വരെ നീട്ടാൻ തീരുമാനിച്ചതായി പ്രധാന മന്ത്രി നരേന്ദ്ര മോദി അറിയിച്ചു. ഏപ്രിൽ 14, ചൊവാഴ്ച്ച രാവിലെ 10 മണിക്ക് രാജ്യത്തെ അഭിസംബോധന ചെയ്ത് കൊണ്ടാണ് ഈ തീരുമാനം അറിയിച്ചത്.
രാജ്യത്ത് നിയന്ത്രണങ്ങൾ കർശനമായി തുടരുമെന്നും, ജനങ്ങളുടെ പൂർണ്ണ സഹകരണം ഈ വിഷയത്തിൽ ഉണ്ടാകേണ്ടതാണെന്നും പ്രധാനമന്ത്രി ഓർമ്മിപ്പിച്ചു. ഏപ്രിൽ 20-നു ശേഷം സാഹചര്യങ്ങൾ വിലയിരുത്തി ആവശ്യമായ മേഖലകളിൽ ഇളവുകൾ നൽകുന്നത് പരിഗണിക്കുമെന്നും അദ്ദേഹം അറിയിച്ചു.
രാജ്യത്തെ അഭിസംബോധന ചെയ്ത് കൊണ്ട് പ്രധാനമന്ത്രി ജനങ്ങളുമായി പങ്ക്‌വെച്ച 7 നിർദ്ദേശങ്ങൾ:
- ജനങ്ങൾ അവരവരുടെ വീട്ടിൽ സുരക്ഷിതരായി കഴിയുന്നതിനോടൊപ്പം, വീട്ടിൽ പ്രായമായവരുടെയും, മറ്റു രോഗങ്ങൾ ഉള്ളവരുടെയും ആരോഗ്യം പ്രത്യേകം ശ്രദ്ധിക്കേണ്ടതായിട്ടുണ്ട്. വൈറസ് ബാധ അവരിലേക്ക് വരാതെ നോക്കേണ്ടത് പരമപ്രധാനമാണ്.
- വീടുകളിൽ തുടരുക, സുരക്ഷിതരാകുക എന്ന ഇപ്പോൾ നിലനിൽക്കുന്ന ജീവിത പ്രക്രിയ തുടരുക, ഫേസ് മാസ്‌ക്കുകൾ ധരിക്കുക. വീട്ടിൽ തന്നെ തുണികൊണ്ട് തയ്യാറാക്കിയ മാസ്‌ക്കുകൾ ഇതിനായി ഉപയോഗിക്കാവുന്നതാണ്.
- നമ്മുടെ ശരീരത്തിലെ രോഗപ്രതിരോധ ശക്തി നിലനിർത്തുന്നതിനും, വർധിപ്പിക്കുന്നതിനായി ആരോഗ്യ കേന്ദ്രങ്ങൾ തരുന്ന മുന്നറിയിപ്പുകളും, നിർദ്ദേശങ്ങളും പാലിക്കുക. ശരീരത്തിന് നിർജലീകരണം വരാതെ നോക്കുക, ഇടയ്ക്കിടയ്ക്ക് ചൂടുവെള്ളം കുടിക്കുക, കൈകൾ വൃത്തിയായി കഴുകുക തുടങ്ങിയ പ്രതിരോധ പ്രക്രിയകൾ തുടരുക.
- കൊറോണ വ്യാപനം തടയുന്നതിനായി ഇന്ത്യ വികസിപ്പിച്ചെടുത്ത ‘ആരോഗ്യ സേതു’ മൊബൈൽ അപ്ലിക്കേഷൻ പരമാവധിയാളുകൾ ഉപയോഗപ്പെടുത്തണം. ഈ മൊബൈൽ ആപ്പിലൂടെ ബ്ലൂടൂത്ത് സംവിധാനം ഉപയോഗിച്ച്, ഒരു വ്യക്തി ഏതെങ്കിലും COVID-19 പോസിറ്റീവ് ആയ വ്യക്തിയുമായി അടുത്തിടപഴകാനിടയായിട്ടുണ്ടോ എന്നും, അതിലൂടെ എത്ര പേരുമായി രോഗവ്യാപനം നടന്നേക്കാമെന്നും കണ്ടെത്താൻ സഹായിക്കുന്നു. ജിയോഗ്രഫിക്കൽ ടാഗിംഗ് സംവിധാനവും മാപ്പിംഗ് സാങ്കേതികവിദ്യയും ഉപയോഗിച്ചാണ് ഈ അപ്ലിക്കേഷൻ പ്രവർത്തിക്കുന്നത്.
- നമ്മുടെ ചുറ്റും കാണുന്ന പാവപ്പെട്ടവരെയും, നിർധനരെയും നമുക്ക് പറ്റാവുന്ന വിധം സഹായിക്കുകയും, അവർക്ക് വിശപ്പടക്കാനുള്ള മാർഗ്ഗങ്ങൾക്ക് പ്രാധാന്യം കൊടുക്കുകയും ചെയ്യുക.
- ഈ പ്രതിസന്ധി ഘട്ടത്തിൽ തൊഴിലിടങ്ങളിൽ എല്ലാവരും ഒരേ മനസ്സോടെ നിലകൊള്ളണമെന്നും, പരസ്പ്പരം കരുതലാവണമെന്നും നിർദ്ദേശിച്ചു. തൊഴിലാളികളെ അവരുടെ തൊഴിൽ നഷ്ടപെടുന്നതിൽ നിന്നും സംരക്ഷിക്കുന്നതിൽ ശ്രദ്ധ ചെലുത്തണം.
- ഈ കൊറോണ പ്രതിരോധ പ്രക്രിയയിൽ മുൻനിരയിൽ നമ്മോടൊപ്പം നിലകൊള്ളുന്ന ആരോഗ്യപ്രവർത്തകരെയും, ഡോക്ടർമാരെയും, നേഴ്സുമാരെയും, മാലിന്യ സംസ്കരണ പ്രവർത്തകരെയും, ശുചീകരണ പ്രവർത്തകരെയും, പോലീസുകാരെയും ബഹുമാനിക്കേണ്ടത് അനിവാര്യം. അവർ നൽകുന്ന മാർഗ്ഗനിർദ്ദേശങ്ങൾ, ആരോഗ്യ സുരക്ഷാ നിർദ്ദേശങ്ങൾ എന്നിവ കർശനമായി പാലിക്കുക എന്നത് ഈ ബഹുമാനത്തിന്റെ ഭാഗമാക്കുക.
ഇതൊരു നിർണ്ണായക ഘട്ടമാണെന്നും, നാമെല്ലാവരും ഒരുമയോടെ ‘വീട്ടിൽ തുടരുക സുരക്ഷിതരാകുക’ എന്ന പ്രക്രിയ അതീവ ജാഗ്രതയോടെ തുടരേണ്ടതുണ്ടെന്നും, അതിലൂടെ ഈ പ്രതിസന്ധി ഘട്ടത്തെ അതിജീവിക്കാമെന്നും അദ്ദേഹം കൂട്ടിചേർത്തു.
