രുചികരമായ പൈനാപ്പിൾ പുളിശ്ശേരി

ഇന്ന് രുചിക്കൂട്ടിൽ ഊണിലേക്ക് മധുരം കിനിയുന്ന രുചികരമായ ഒരു പൈനാപ്പിൾ പുളിശ്ശേരി എങ്ങിനെ തയ്യാറാക്കാം എന്ന് നോക്കാം.

ആവശ്യമായ വിഭവങ്ങൾ:

പൈനാപ്പിൾ – ഒരെണ്ണത്തിന്റെ പകുതി (നല്ല പഴുത്ത പൈനാപ്പിൾ തിരഞ്ഞെടുക്കുക) ചെറുതായി കഷ്ണങ്ങളാക്കുക
മഞ്ഞൾപ്പൊടി – ഒരു നുള്ള്
ഉപ്പ് – ആവശ്യത്തിന്
മോര് – പുളി അനുസരിച്ച് ആവശ്യത്തിന്

അരപ്പ് തയ്യാറാക്കാൻ

നാളികേരം – 1 മുറി ചിരകിയത്
ജീരകം – കാൽ ടീസ്പൂൺ
പച്ച മുളക് – 2 എണ്ണം

താളിക്കാൻ

കടുക് – 1 ടീസ്പൂൺ
വറ്റൽ മുളക് – 2 എണ്ണം
കറിവേപ്പില – 2 തണ്ട്
ഉലുവ – കാൽ ടീസ്പൂൺ
വെളിച്ചെണ്ണ – 2 ടേബിൾസ്പൂൺ

തയ്യാറാക്കുന്ന വിധം:

1. ചെറുതായി നുറുക്കിയ പൈനാപ്പിൾ കഷ്ണങ്ങൾ ഉപ്പും, മഞ്ഞൾപ്പൊടിയും ചേർത്ത് ആവശ്യത്തിന് വെള്ളത്തിൽ വേവിച്ചെടുക്കുക. ഇത് വെന്തുകിട്ടാൻ അധികം സമയം ആവശ്യമില്ല.
2. നാളികേരം, ജീരകം, പച്ചമുളക് എന്നിവ നന്നായി അരച്ചെടുക്കുക. വെന്ത പൈനാപ്പിളിലേക്ക് ഈ അരപ്പും പുളിക്ക് ആവശ്യത്തിന് മോരും ചേർത്ത് നല്ല പോലെ ഇളക്കി യോജിപ്പിക്കുക. ഉപ്പും മധുരവും എല്ലാം പാകം നോക്കുക. ആവശ്യമെങ്കിൽ അല്പം പഞ്ചസാര ചേർത്തുകൊടുക്കാം.
3. ഇത് പതഞ്ഞു തുടങ്ങുമ്പോൾ അടുപ്പത്തു നിന്ന് മാറ്റാം.
4. ഒരു ചീനച്ചട്ടിയിൽ വെളിച്ചെണ്ണ ചൂടാക്കി അതിൽ കടുക്, വറ്റൽ മുളക്, കറിവേപ്പില, ഉലുവ എന്നിവ പൊട്ടിച്ച ശേഷം പുളിശ്ശേരിയിലേക്ക് ചേർത്തിളക്കുക.

രുചികരമായ പൈനാപ്പിൾ പുളിശ്ശേരി തയ്യാർ!

തയാറാക്കിയത്: ഹാംലറ്റ് ഇ, കൊച്ചി