നാവിൽ വെള്ളമൂറുന്ന ഒരു അടിപൊളി മസാല ഞണ്ട് റോസ്റ്റ്

ഇന്ന് രുചിക്കൂട്ടിലൂടെ ഒരു അടിപൊളി മസാല ഞണ്ട് റോസ്റ്റ് ഉണ്ടാക്കുന്നത് എങ്ങനെ എന്ന് നോക്കാം. ഈ ഒരു കറി ഉണ്ടെങ്കിൽ ചോറിന് വേറെ ഒരു കറിയുടെയും ആവശ്യമില്ല; അത്രയ്ക്ക് രുചികരമാണ് ഈ ഞണ്ടുകറി.

മസാല ഞണ്ട് റോസ്റ്റിനു ആവശ്യമായ ചേരുവകൾ:

ഞണ്ട് കഴുകി വൃത്തിയാക്കിയത്- 3/4 കിലോ
‌ സവാള- 4 വലുത്
‌ പച്ചമുളക്-5 എണ്ണം
‌ ചെറിയുള്ളി-12 എണ്ണം( രണ്ടായി മുറിച്ചത്)
‌ വെളുത്തുള്ളി-20 അല്ലി
‌ ഇഞ്ചി-2 വലിയ കഷ്ണം
‌ മല്ലിയില- ചെറുതായി അരിഞ്ഞത് ആവശ്യത്തിന്
‌ കറിവേപ്പില- ആവശ്യത്തിന്
‌ ഉപ്പ്- ആവശ്യത്തിന്
‌ തക്കാളി-2 വലുത് ( ചെറുതായി അരിഞ്ഞത്)
‌ വെളിച്ചെണ്ണ- മസാല വഴറ്റാൻ ആവശ്യമുള്ള അത്രയും
‌ കുടംപുളി -ഒരു ചെറിയ കഷ്ണം
‌ മഞ്ഞൾപൊടി- 1 ടീസ്പൂൺ
‌ മല്ലിപ്പൊടി-3 ടേബിൾസ്പൂൺ
‌ സാധാ മുളകുപൊടി- ഒന്നര ടേബിൾസ്പൂൺ
‌ കാശ്മീരി മുളകുപൊടി- 1 ടേബിൾസ്പൂൺ
‌ കുരുമുളകുപൊടി-2 ടേബിൾസ്പൂൺ
‌ ഗരംമസാലപ്പൊടി-1 ടേബിൾസ്പൂൺ
‌ ചെറുചൂടുവെള്ളം-1/2 ഗ്ലാസ്

‌ഞണ്ട് റോസ്റ്റ് എങ്ങിനെയാണ് തയ്യാറാക്കേണ്ടത് എന്ന് നോക്കാം:

ഒരു ചട്ടി അടുപ്പിൽ വച്ച് ചൂടാകുമ്പോൾ അതിലേക്ക് ആവശ്യമായ വെളിച്ചെണ്ണ ഒഴിക്കുക, വെളിച്ചെണ്ണ ചൂടായി വരുമ്പോൾ അതിലേക്ക് കറിവേപ്പിലയും വളരെ നേർമയായി അരിഞ്ഞു വച്ചിരിക്കുന്ന സവാളയും ചേർക്കുക.
സവാള ഒന്ന് ചൂടായി വഴന്നുവരുമ്പോൾ അതിലേക്ക് ചെറിയുള്ളി, ചതച്ചെടുത്ത ഇഞ്ചി, വെളുത്തുള്ളി, അരിഞ്ഞുവെച്ച പച്ചമുളക് എന്നിവ ചേർക്കുക.
ഇതെല്ലാം നന്നായി വാടി വരുമ്പോൾ അതിലേക്ക് എടുത്തു വച്ചിരിക്കുന്ന മഞ്ഞൾപ്പൊടിയും, മല്ലിപ്പൊടിയും ചേർക്കുക. ഇതൊന്നു കുറച്ച് ചൂടാകുമ്പോൾ ബാക്കിയുള്ള പൊടികളും… മുളകുപൊടി, ഗരം മസാല, കുരുമുളകുപൊടി എന്നിവയും ചേർത്ത് നന്നായി ഇളക്കി മൊരിഞ്ഞു വരുമ്പോൾ മാത്രം തക്കാളി ചേർക്കുക.
മസാലയും തക്കാളിയും നന്നായി കുഴഞ്ഞു വരുമ്പോൾ ആവശ്യത്തിന് ഉപ്പും, അര ഗ്ലാസ് ചെറു ചൂട് വെള്ളവും, ഒരു കഷ്ണം കുടംപുളിയും, മല്ലിയിലയും, അതിലേക്ക് വൃത്തിയാക്കി മുറിച്ചു വച്ചിരിക്കുന്ന ഞണ്ടും ചേർത്ത് മീഡിയം തീയിൽ അടച്ചു വച്ച് 10 മിനിറ്റ് വേവിക്കുക.
പിന്നീട് തീ സിമ്മിൽ ആക്കി 20 മിനിറ്റ് കൂടെ മൂടിവെച്ച് വേവിക്കുക ഇടയ്ക്ക് മൂടി തുറന്നു രണ്ടോമൂന്നോ പ്രാവശ്യം കറി നന്നായി ഇളക്കി കൊടുക്കണം.
അരമണിക്കൂറിന് ശേഷം അടുപ്പ് ഓഫ് ചെയ്യുക.